Ceiliúrann Seirbhís Ealaíon Chomhairle Contae Chill Dara Lá Fhéile Pádraig in Áras an Uachtaráin
21 Márta 2025: Ba mhór an onóir do Sheirbhís Ealaíon Chomhairle Contae Chill Dara freastal ar fháiltiú speisialta i dteannta an Uachtaráin Mícheál D. Ó hUigínn agus Sabina Uí Uigínn in Áras an Uachtaráin ar Lá Fhéile Pádraig.
Óstálann an tUachtarán agus Sabina Uí Uigínn an fáiltiú seo go bliantúil – déantar ceiliúradh ar Lá Fhéile Pádraig agus cuirtear fáilte roimh ghrúpaí agus roimh dhaoine aonair a bhfuil obair shuntasach déanta acu chun leas shochaí na hÉireann. I mbliana ag an ócáid, ceiliúradh tionscnamh an Uachtaráin, ‘Samhlaíocht agus An Náisiún — Imagination and the Nation’ . Sa tionscnamh seo, leagtar béim ar an ról cumhachtach claochlaitheach atá ag an ealaín agus ag an gcruthaitheacht i bhforás na hÉireann mar phoblacht agus mar idé.
Rinne Oifigeach Ealaíon Gníomhach Chomhairle Contae Chill Dara, Eláine Donnelly, ionadaíocht ar Sheirbhís Ealaíon na Comhairle, agus d’fhreastail Oifigigh Ealaíon eile ó gach cearn den tír ar an ócáid, mar aon le healaíontóirí agus grúpaí pobail. Sheinn baill Chraobh Bheartla Uí Fhlatharta, Comhaltas Ceoltóirí Éireann, Léim an Bhradáin don Uachtarán agus do Bhean Uí Uigínn, agus léiríodh traidisiún saibhir an cheoil Éireannaigh agus an chultúir i gCill Dara.
